【今日農曆7月14 】細膽鬼入嚟!呢啲唔恐怖會笑出聲嘅鬼片啱晒你

今日就係農曆七月十四,阿媽一定有同你講呢段時間唔好出夜街,咁喺屋企有咩做嚟應節呢?當然就係睇鬼片啦!但係膽小鬼或者一家大細又唔可以睇太恐怖嘅電影,不如睇下會笑出聲嘅「鬼片」啦!

《回魂夜》(1995)

image

一講《回魂夜》就一定諗起「星爺」周星馳,咁見到周星馳就當然知道係笑片啦!呢套黑色幽默經典電影雖然提及鬼魂,又集恐怖、血腥於一身,不過當然亦有周星馳擅長嘅搞笑元素啦!

《魂魄唔齊》(2002)

image

呢套電影可謂星光熠熠,有齊陳奕迅、容祖兒、謝霆鋒,呢個陣容真係冇咩機會再見到!雖然《魂魄唔齊》以戲班有鬼做故事主線,不過其實講嘅都係愛情、友情同親情,驚嚇位就…..真係好少,所以各位膽小嘅觀眾都可以放心睇!而且Eason喺電影中仲會反串做花旦,可以話係最大嘅驚喜位!

《我左眼見到鬼》(2002)

image

故事講述鄭秀文飾演嘅何麗珠因為一次旅遊邂逅有錢人Daniel,相識七日就閃電結婚。點知未返到香港,Daniel就已經意外溺斃。後來何麗珠因為一次車禍而左眼開始見到鬼,而且仲見到佢嘅小學同學王勁威嘅鬼魂(劉青雲飾)。從此佢哋就一齊幫助其他鬼魂,可惜一路都見唔到自己過世嘅老公,究竟最後佢哋會唔會再重遇呢?

《救殭清道夫》(2017)

image

《救殭清道夫》算係近期最新嘅一套港產搞鬼喜劇,主角有蔡瀚億飾演單純儍戇四眼仔同馬來西亞女神林明禎做殭屍。雖然呢套係新戲,但係內容就相當懷舊,當中就包括茅山符咒、功夫武術同人鬼情緣,不過就加入咗新世紀的風趣變化。如果你好鐘意《殭屍》嘅話,呢套電影就未必啱你,不過如果你已經睇厭西洋殭屍嘅話,不妨可以試下呢齣輕輕鬆鬆嘅殭屍片。

《九個女仔一隻鬼》(2002)

image

《九個女仔一隻鬼》雖然都係有一個鬼字,不過呢個鬼係由當年迷死無數少女嘅陳冠希飾演,俾你見到佢都驚唔落啦!呢套電影仲有一班當年青春無敵嘅Stephy同佢班餅碎一齊拍,擺到明其實就係青春愛情片!故事講述Stephy因為車禍而遇上陳冠希飾演嘅鬼,Stephy一路幫佢尋找記憶,而Edison就幫嘉嘉贏得球賽同幫佢考試等等,肯定為你搵返puppy love嘅感覺!

《五個嚇鬼的少年》(2002)

image

呢套2002年嘅電影英文名叫《The Mummy, Aged 19》,不過大家唔好誤會,佢並唔係《盜墓迷城》(The Mummy)嘅前傳,而係由當年仍然係小鮮肉嘅Shine主演嘅木乃伊電影。雖然電影低成本,不過就Cult味十足,驚嚇得嚟又玩味。故事講述二十多歲嘅陸寶寶(徐天佑飾)經朋友介紹去到一幢大廈做夜更,點知就喺地庫揾到兩具木乃伊,仲搞到上咗寶寶身添!

《古宅心慌慌》(2003)

image

電影《古宅心慌慌》故事講述醫學家丁濟懷去世後將遺產分俾八位由不同妻子所生嘅子女,令到佢哋喺老竇嘅恐怖古宅中聚首一堂。當晚正正就係丁濟懷嘅回魂夜,古宅內開始怪事連連,不過由Twins、Boyz主演,所以恐怖極有限啦!

《天師鬥殭屍》(2014)

image

由王晶監製嘅《天師鬥殭屍》係一套黑色喜劇,由元彪、鄭中基、伍允龍、胡然、關楚耀、羅子喬領銜主演。電影除咗以殭屍做題材,同時亦加入喪屍、鬼魂等,非常熱鬧。雖然呢套電影被好多影評人劣評,不過大家都知道王晶電影一向以無厘頭見稱,同時亦係港產電影其中一個特點,香港人放鬆啲啦!

《見鬼10》(2005)

image

當年好多人都被《見鬼》舐叉燒一幕嚇親,不過嗰套其實係《見鬼》,而家講緊嘅係《見鬼10》,有梁洛施同陳柏霖主演。故事講述一班後生仔買咗一本見鬼10法嘅書,之後就開始咗萬劫不復嘅見鬼之旅。冇錯!雖然片中不斷都有鬼出現,不過唔知點解佢哋嘅動作非常搞笑。就好似一名女仔撞邪,一班僧侶就同佢大戰,呢個女仔冇打佢哋,但係就用條俐逐一咁舔僧人光溜溜嘅頭頂,你肯定冇見過呢種情節。仲有咩笑位,自己發掘啦!

《開心鬼》系列(1984、85、86、90、91)

image

《開心鬼》顧名思義就係就算你見到鬼,你都一樣會咁開心!《開心鬼》系列分為《開心鬼》、 《開心鬼放暑假》、 《開心鬼撞鬼》、 《開心鬼救開心鬼》、《 開心鬼上錯身》。由擅長拍喜劇嘅黃百鳴監製、編劇兼主演,而呢套電影更加係佢嘅成名之作。當中除咗攪笑劇情外,更加有一班絕世美女袁潔瑩、羅美薇、陳加玲、李麗珍參演,一定睇到你心花怒放。

《殭屍先生》(1985)

image

《殭屍先生》曾經被譽為係殭屍片中嘅典範,1985年上映嘅時候香港總票房更高達二千萬港元,同時亦開創咗殭屍電影風潮。而當時林正英、錢小豪、陳友、樓南光、許冠英等喺電影中嘅演出更加係好多香港人嘅集體回憶。唔講唔知,其實我哋好多對殭屍嘅認識就係由呢套電影到出嚟,就好似殭屍有兩隻尖牙、力大無窮、刀槍不入、見到佢哋唔好呼吸等等,經典程度毋庸置疑。熱愛殭屍片嘅觀眾無可能錯過!