名校「絲打」：企最前排持盾擋子彈、只係希望自己有啲用 冀明年考入「暴大」

「就算唔係示威者，as a 人，強身健體都係一件好應該嘅事，何況你畀狗追嘅時候，真係更加知道『書到用時鍾樹根』」Mary（化名）認真地說。「書到用時鍾樹根」是幾年前網民嘲諷民建聯前立法會議員鍾樹根的用語，形容鍾年少時唔讀書、語文能力差，Mary借用解釋體能亦如是，平日不鍛練、真要跑起來就GG（完蛋）。

「連登絲打」Mary讀傳統名校，是某政府高官的師妹。現年18歲的她是應屆文憑試（DSE）考生，但在剛過去的暑假忙於在前線擋子彈、「食催淚彈放題」。雖然暑假至今仍每星期去補習4堂，「如果要取捨嘅時候，咁就梗係捨補習（上前線）啦，我都有盡量去維持我學業有限度嘅服務，但好明顯就維持唔到，就好似港鐵一樣。」她說，希望明年可以考上「暴大政政」（中文大學政治及行政學系）。

「如果無呢個運動，我暑假應該就係：盡量打少啲機、開始溫書、補吓習，想pick up番自己嘅學業。我一路都想嘅，即係好似我想發達、我想減肥，全部都係想。你知唔知道呢個世界最遙遠嘅距離就係想同埋做，然後我一路只係想，只有呢個社運，我先至真係做。」

九月份，暑假結束，反送中運動未了，多間大專院校及中學在開學日罷課。就讀傳統名校的中六生Mary亦在校內參與罷課，接著的日子，她忙於幫手宣傳罷課、人鏈活動，周末繼續上前線。九月某個星期一，與Mary約在港島一個公園做訪問。她家在不遠處，放學回家休息一下再「踢拖」出來。訪問剛開始，她比較像是準備充足的考生，但漸漸地就流露出「絲打」氣息，過不了多久，她直接表示自己「連登味濃」。

Mary參與校內罷課，政見深藍的母親極力反對，不願意為她簽署家長同意書。Mary說：「佢好驚無咗啲個人利益，instead of 擔心我點解要咁樣做。佢完全唔care我點解要咁樣做、背後嘅理念同原因，佢只係覺得我咁樣做會影響到佢、話我咁樣做好自私。所以9月2號之後我同佢完全徹底割咗席。我而家繼續住喺佢間屋度，但都只係因為我無錢搬出去住。」

在Mary幾歲的時候，父母親離異。成長於單親環境，Mary與母親關係算不上親密，她甚至形容是「河水不犯井水」。至於父親，Mary認為他對政治不甚了解，只會人云亦云，但十分支持她，「因為我係佢嗰女，佢以我為最重要，但同佢嘅政治立場無關係。佢唔知道我係前線，佢以為我只係搞吓罷課。」Mary續說，父親最後替她簽了同意書，不料母親違反諾言，本來表示不會干預她父親的決定，後來竟打電話給她父親，叫他到學校「撤回」同意書。Mary說到這裡非常憤怒，「即係（母親）對住林鄭呢，又唔叫佢撤回，但就想叫我老豆撤回簽名！」

Mary於是找父親食早餐，解釋罷課的原因，成功說服他別撤回。Mary稱，自小由傭人照顧，認為父母「只有提供起居飲食，無任何價值觀嘅栽培，或者個人品德嘅培養」。父母亦不催谷她讀書，入讀名校只是因為小學升中一條龍。她又指，雖然有兄弟姊妹，但哥哥年紀大許多，已出國多年；細妹則太年幼，沒甚話題，所以Mary更傾向形容自己是獨生女。

「屋企唔算好有錢，但有樓留俾我，而家割咗席，冇啦。有車，但唔係用嚟車我。即係夠我衣食無憂，稱唔上好奢侈，可以一年去1至3次旅行。」成長於優渥的環境，住在灣仔私樓，13歲以前的Mary仍不知政治為何物。

直到2014年，雨傘運動成為她的政治啟蒙，「嗰陣13歲都好難關心啲咩政治，不過叫做知道有反國教、年頭台灣有太陽花（學運）。嗰陣我都係只係知道要爭取真普選同埋點解要爭取，例如因為小圈子選舉咁。主要觸發點係928見到啲狗射Tear gas，點會諗到五年後Tear gas係最低消費。同埋自己都成日玩Facebook、 IG嗰啲，接收到嘅資訊都比較多，所以唔會話好離地。」她還記得，9月28日那個黃昏她與母親在板長食飯，睇新聞見到催淚彈在人群中爆開，遂決定要站出來。9月29日，學校停課，Mary於是一大早去到金鐘，首次參與社會運動。

那時候，同學們大多未有意識參與社運、只是影相打卡，Mary自己也不過是在街頭度過了一些日子，但她開始體會到「是你教我們和平遊行是沒用」。那一場運動，亦促使了她在高中選修中史科，「我唔係因為讀中史所以反共，係因為我反共所以先讀中史，因為我想同人理論嗰陣可以用史例撻人，當然啦讀完中史更加覺得自己反得無錯。屌你老母共產黨殺自己人，仲多過全世界任何一個國家殺中國人。我未變態到支持日本侵華，但講真殺中國人呢方面，共產黨實在不遺餘力。」另一選修科是經濟科，「無乜好講。」

回到今天的反送中運動，Mary說：「我學校其實港豬比較多，好多都好離地，同埋有錢人都唔少，加上就算係黃，啲人都好撚乖，唔敢反抗，唔敢搞事，只會心入面支持。我都幾肯定如果今次我冇帶頭，學校一定唔會有人敢搞我做嘅嘢，不過今次運動都喚醒咗好多人，當然啦，要裝睡嘅人叫不醒，但嗰啲人就準備burn with us啦柒頭。」Mary指，校內只有相熟同學和老師知道她參與運動，但不知她走得這麼前。有已經離校的老師都很關心Mary，間中問她是否安全、為她祈禱等，她說：「feeling blessed」。

當初反對修例，她說不是因為誰人會被「送中」，而是認為「當政府得到呢個權力既時候，自然會造成嚴重既自我審查，社會進入白色恐怖，全民不敢反抗，政府更加霸道無理......去到之後，政府完全唔回應、越嚟越多問題浮面，例如黑警濫捕，司法制度嘅根本問題就慢慢浮面，跟住我就覺得呢個問題已經返唔到轉頭。」

在過去三個多月，Mary有時拿著木製盾牌走到最前排，對面就是隨時擎槍的警員，「其實係驚嘅，即係個感覺好似有人攞支槍瞄住你咁樣。」她又深覺警察有意瞄頭開槍，所以計劃升級頭盔，「而家係職安真漢子（地盤工人）嗰啲，我諗住遲啲就會升級做單車頭盔，無咁柒啦，即係你戴住個黃色頭盔，驚死人唔知嗰度係你個頭咁，所以我諗住遲啲換黑色嗰啲頭盔。」

若問為何走到咁前，她只道：「我覺得我可以勇武，咁我咪做。因為我有啲friend真係好驚，如果比起佢哋，我少咗呢份恐懼，咁我咪幫佢哋做埋佢哋唔敢做嘅嘢。」談到底線，Mary說不會揸刀／棍主動攻擊人，但有準備做「魔法師」（投擲汽油彈之類）。面對刑責，她沒有太多想像，但最擔心的不是坐監，而是在獄中遭受不人道待遇。

「其實無人想被人拉，只不過你覺得呢個地方值唔值得你去押上你嘅前途、你未來十幾年嘅青春，你都要去做？呢個就係問題所在。如果佢覺得香港呢個地方唔值得佢去獻身嘅話，就算佢有無膽都唔會咁做。」她說。

Mary自言身手不敏捷，但希望自己「有啲用」，所以選擇站在前排的位置。「我其中一個friend比較嬌小玲瓏，跑得勁快嗰啲，佢就做熄煙（彈淚彈），因為佢反應同身手都快，即係佢會做比較hit and run嘅嘢，我就無計，hit完run唔到，被人hit返轉頭就有份。」Mary多數都會及早起跑，「見到佢哋向前衝咁梗係走。我係拔腿就跑，跑到無雷公咁遠，跑到安全先至停嘅。但三個月以嚟都無瘦到。」

她續道：「我覺得真係每個香港人都要練吓體能，要強心健肺。就算唔係示威者，as a 人，強身健體都係一件好應該嘅事，何況你畀狗追嘅時候，真係更加知道『書到用時鍾樹根』。」

Mary認同，因為名校生的身份更容易取得媒體曝光，但她指出這身份與走上前線沒有關係，「其實名校生都只係一個外人點睇我嘅身份，唔會影響到我嘅價值，都唔會影響我喺呢個運動前線嘅位置 。我都唔會因為自己名校生覺得自己前途無可限量、大個會飛黃騰達，因而放棄一啲我覺得係正確嘅事。而且香港搞到咁樣，飽讀聖賢書，雖然我冇，更加有責任盡自己所能去貢獻呢個社會。每個人係呢場運動都有自己嘅位置，冇話前線特別高尚，最緊要搵到自己嘅定位，各司其職。」

運動已經歷時超過三個月，Mary稱母親一毫子都無俾過自己，自己也不願意問她攞錢，而且自9月初割席後已經沒有跟對方講過一句話。以往每次問母親攞零用錢，都有500或1000元，現在幸得父親和男朋友都樂意給予財政支援，她才應付到補習費、學校雜費和生活開支，「我個銀包空咗好耐，所以一打開個銀包，你想買咩都即刻收皮。」而且示威現場有人派食物，Mary說食過飯團、麻醬烏冬、咖喱飯等，說起來她都覺得自己食得太多。

開學之後，Mary繼續在周末參與抗爭活動，「暫時都仲係早放，我平時放學都可以返屋企瞓覺，但係之後，可能會慢慢適當地減少我參與嘅程度，因為我要溫書，唔好講我攰唔攰呢啲廢話，有邊個香港人唔攰。我要溫書，我真係想讀大學。」她說自己的成績屬中上游，想考上中大政治及行政學系則仍須努力。

Mary又認真說，「我覺得如果呢個運動輸咗嘅話，我係會自殺。因為你幻想到如果輸咗呢個運動，到底香港會變成點，你已經預示到好似新疆咁樣，即係你見到啲人喺集中營、畀人啪懵仔針。我接受唔到，我曾經最愛嘅香港會變成一個咁樣嘅地方，我接受唔到我要面對咁樣嘅情況。」

「希望大家吉人天相。如果呢場運動輸咗，香港死硬，好似六四咁樣，但個倒退唔只30年。我哋可以一齊去新疆，起碼一定極大規模清算所有參與過呢場運動嘅人。所以，『香港人』下一句唔應該係『加油』，應該係『退無可退』」Mary在訪問最後如是說。

觀看原文： 按此連結