奧斯卡最佳外語片代表 女星靠個咀演活獸性怪人

平時睇得荷里活電影多，今日換下口味睇睇北歐作品，早前於康城影展獲得「一種關注」大獎嘅《Border》。電影改編自John Ajvide Lindqvist同名小說《Gräns》，佢亦係電影版其中一個編劇。

你可能會覺得呢個名字陌生，但講起佢前作《血色童話》（Let the right one in）係咪有少少印象？《血》有別一貫睇開嘅彊屍片，講述12歲吸血彊屍Eli同小男孩Oskar互相依賴嘅故事，除左結合驚慄血腥，仲講出作為異類／唔合群嘅寂寞。故事仲被拍成美國版，由《勁揪俠》女星Chloe Grace Moretz飾演殭屍一角。

《Border》同樣講述身為異類嘅痛苦與掙扎，比《血色童話》更怪異，集血腥驚慄性愛於一身。故事講述其貌不揚滿身傷痕嘅海關關員Tina擁有驚人嗅覺，可以聞出人嘅情緒，憑住呢種技能聞到旅客攜有兒童色情影片！工作雖然受到賞識，但工作以外嘅Tina因為自己嘅外表同能力而感到自卑，直至遇上同佢擁有相同能力及傷疤嘅Vore。

Tina同Vore一見如故，與Vore嘅相遇意識到自己嘅真實身份，同時又令2人跌入人口販賣嘅圈套，自保之餘又令Tina質疑自己存在於世嘅意義。電影有多個劇情轉折位，令影迷難以預測故事走向，倍感不寒而慄。

驚慄元素以外，其中Tine與Vore森林交歡一幕，充滿獸性嘅叫喊同體位，都震撼唔少專業影人，睇到叫出聲。導演Ali Abbasi就強調性愛場面切合2位主角擁有異於常人能力，燭光晚餐約會做愛先唔正常。

故事引人入勝，演員功力都不可抹殺，以飾演Tina既Eva Melander為例，唔止為角色增肥，仲配合特技化妝，成塊面除咗個嘴都貼哂矽膠面具，全程只靠個嘴做戲。為咗展現女主角嘅動物本能，戲中Tina每次聞嘢時都會抽動上唇！仲未計Tina因家庭暴力、外表異於大眾而自卑，被孤立嘅複雜情緒，真係少啲功架都搞唔掂！難怪可以代表瑞典參加奧斯卡最佳外語片。