Yahoo奇摩運動 對抗壞情緒 5套睇完feel good心水推介
壓力呢樣嘢，唔係用客觀條件可以決定，總有人會話「你有份工」、「你搵咁嘅錢」、「你另一半點點點」仲唔知足，仲唔開心呀？遇著呢啲回應，真係啞子食黃蓮，有苦自己知。
每個人都有情緒與壓力，我地應該尊重大家各自處理與排解嘅方法，如果今日嘅你有少少低落，想獨處調整下，除左對自己好啲，食好西、買份禮物俾自己，我地仲揀咗以下5套令你cheer up，心情好啲嘅電影。
92年《家有囍事》
賀歲片經典，港產喜劇最強，誰不愛常歡一家？又有邊個唔鐘意無雙表姐同常騷一對？常家三兄弟：大哥包二奶、二哥單戀神隱嘅婉君表妹、三弟瘋狂溝女，加上為家庭變成黃面婆嘅程大嫂、好鐘意睇電視嘅父母，同瘋狂女友何里玉，結果交出一個大團圓，令人好開心嘅結局。賀歲片一定係喜慶加喜事，有種笑料係百睇不厭嘅。
《五個撲水的少年》（Water Boys)
5個平凡又被無視嘅高中生因為美女教練加入游泳隊，點知老師一個唔該放產假閃左人，無人帶領又唔可以退出嘅情況下，唯有頂硬上自學韻律泳，於校園文化祭表演，過程當然笑料百出。不過，努力有回報，招收到好多新團員，仲表演成功！
電影真人真事改編，1989年日本崎玉縣一班高中男生受奧運韻律泳啟發，決定於學校表演，結果大受歡迎。男子韻律泳成為左當地著名活動。電影上映前一年吸引左2萬人到崎玉縣欣賞呢班水男孩嘅演出。一班著住泳褲仔、青春無敵嘅後生仔真係好養眼。
《陽光小小姐》（Little Miss Sunshine)
全家人陪7歲豬妹去選美，阿爺好色��好毒品、老豆開口埋口只在乎輸嬴但破左產、舅父被仔飛又事業不順個人灰到爆、阿哥為左做空軍唔講嘢9個月先知自己原來色盲。阿媽唯一正正常常，成家人無個過得順順利利，不過佢地有天真無邪嘅豬妹Olive，人生再唔順境都因為妹妹嘅童言童心而變成小菜一碟，人生無試過無盡情過先係最大嘅輸家。唔係最陽光燦爛勵志片，但夠窩心。
《茱莉對茱莉亞－隔代廚神》 (Julie & Julia)
紐約OL工作失意，將自己嘅熱情興趣投入挑戰食譜界經典《Mastering the art of French cooking》內524道食譜，全部跟足步驟整一次！佢將過程與體會寫到blog度，結果開啟人生新局面。
戲入面嘅茱莉同茱莉亞都係真人，茱莉亞係煮食界天后，堪稱「美國方太」；另一個茱莉亞就因為跟隨天后本cookbook一日一味而成名。故事被寫成小說再改編成呢套戲，本來單純安慰自己嘅小活動，帶來意想不到嘅人生新一頁。成套戲所有角色都係loveable，Meryl Streep 固然做得好，Amy Adams飾演嘅打工仔亦相當討好，加上大量美食，簡直係feel good combo！
《激戰》
覺唔覺人大左反而會迷失，又唔知自己做緊乜？又或者曾經天之驕子依家無活出理想中嘅自己？《激戰》就係中年人跌低再爬番起身嘅故事。戲內有唔少勵志金句︰
「你行得上台，唔好怯呀，怯，你就會輸咗成世」
「我哋到咗呢個年紀，仲有嘢要人哋明白架咩？你自己明咪得囉」
「呢廿幾年嚟，我咩都沒做過啊。我唔想到我熄燈果一刻，我連一件值得回憶嘅事都無呀」
試左唔得無問題架，擁抱過程先係最重要嘅。一時嘅不順可能係明日成就嘅起點，好好享受當下啦！
套戲嗰陣力sell張家輝果排腹肌，仲激勵左為數不少嘅男士去健身，修身有成嘅你好叻呀！其實，運動都好有益，不如今日出去聽住歌跑個步啦！
