疫情燒到荷里活 《花木蘭》隨時「核爆式仆直」

受新型肺炎影響,香港影視界飽受衝擊,戲院人流大跌;而內地疫情最為嚴重,戲院直頭要停業,所有電影、電視劇嘅拍攝要全面停工,中港合拍片審批、拍攝全部停哂,好多電影幕後工作人員無工開,認真大鑊!隨住疫情於全球擴散,受影響嘅唔止中港兩地電影業,連荷里活都受到牽連!

湯告魯斯同成隊crew本來要去威尼斯3個星期拍《職業特工隊7》,但因為當地錄得超過600宗確診個案,考慮到工作人員及班星嘅人身安全,同埋怕拍拍下被封關返唔到美國,拍攝計劃被逼取消。進度直接受影響,一係急急腳另搵地方拍攝、一係改劇本,是但一樣都增加製作成本同搞到片期,要追票房條數又大咗。

《007:生死有時》本來定咗全員去北京開記招兼做首映,不過依家咁嘅時勢梗係取消行程啦。而且內地戲院復工無期,由農曆年開始無新片上映,積埋咁多片,007都唔知要排到幾時先有得上,越遲上越影響票房,荷里活想係中國賺多啲呢支歌仔,今年應該唱唔成。

不過最大鑊應該係由劉亦菲、李連杰、鞏俐、甄子丹擔正嘅真人版《花木蘭》。本來《花》以全亞裔演員上陣,仲係首部要家長指引(PG-13)嘅迪士尼動畫真人版翻拍電影,落重本投入接近2億美金拍攝,風險都唔細。捱過咗北美觀眾抗議無咗木須龍、又捱過咗劉亦菲撐港警引起嘅「杯葛木蘭」風波(或者根本懶理), 一心諗住食北美本土同內地市場,票房夠回本有餘,點知撞正新型肺炎!

北美頂硬上繼續3月尾公映,不過美國疫情開始有蔓延跡象,屆時有幾多人無懼感染入戲院,仲係未知之數。而第二大票倉中國就暫時上映無期,接連其他票房重鎮都要改期,日本、韓國受疫情影響將《花》延至5月上映!外國有網友就睇淡《花木蘭》無望回本,仲以「核爆式仆直」(atomic flop)形容,估計會成為迪士尼史上蝕得最甘嘅一套電影!

睇返資料,原來劉亦菲都係武漢人,自己故鄉有事,佢應該感受最深。