蕭正楠窒曹永廉唱到公司執笠

余思霆着拖鞋,唔想着高踭鞋受罪!
余思霆着拖鞋,唔想着高踭鞋受罪!

蕭正楠、曹永廉「合體」開騷,反應不俗,遂決定組成中佬組合「老廉蕭Show」再闖樂壇,雖然拍住上搵銀,但阿蕭都不忘窒阿廉當年唱到幾間唱片公司執晒笠,阿廉亦自嘲粉絲年齡層出現嚴重斷層!

藝人曹永廉、蕭正楠、余思霆及何遠東等,日前在將軍澳學校區為無綫新劇《愛美麗狂想曲》開工。阿蕭與阿廉早前於九展開騷後,觀眾反應不錯且獲客戶賞識,二人宣布組成中佬組合「老廉蕭Show」,待《愛》劇竣工後約明年初左右,計劃回歸樂壇,阿蕭笑說:「阿廉以前做歌手,唱到幾間唱片公司執笠呀!估唔到我哋去到中年,樂壇仲需要我哋。」

阿廉坦言近日有唱片公司與他們接觸,二人亦不乏「合體」工作機會,他打趣說:「自從02年有唱片公司好大膽咁再搵我出唱片,結果蝕咗人哋好多錢後,呢十幾年都冇再入錄音室喇,估唔到依家又有人搵,不過應該出唔到大碟,只係玩票性質出幾隻歌仔,喺網上推出或者方便登台用,嚟緊我哋會先去馬來西亞做騷。我同阿蕭都係由樂壇轉戰視圈,依家演戲係我正職,所以之前開演唱會練聲都有啲壓力呀!」

余思霆踢拖免受罪

外景期間正值放學時段,阿廉被排隊上校車的小朋友認出,他即行近打招呼兼「送車」,事後搞笑說:「其實幾歲同80歲都好鍾意我,只係中間出現咗『斷層』。(呢排忙到冇時間送仔女返學?)最慘係幾年暑假我都要工作,根本冇陪佢哋去玩,佢哋有同朋友仔去旅行嘅,只係習慣咗冇我參與其中,我係負責畀錢嗰個。」

同場的余思霆着拖鞋現身,原來有苦自己知:「早幾日我哋幾個女仔拍咗場戲,講我哋着晒高踭跟鞋用超級市場嘅手推車,推住車上嘅蝦頭(楊詩敏)落斜,點知一拍拍足5、6個鐘,我雙腿真係痛到想喊,依家覺得着一秒鐘嘅高踭鞋都受罪,所以平時唔顧得咁多,踢拖返工囉!」

曹永廉(左)被蕭正楠窒完,都不忘自嘲一番!
曹永廉(左)被蕭正楠窒完,都不忘自嘲一番!
余思霆與何遠東拍外景時,整古作怪。
余思霆與何遠東拍外景時,整古作怪。