【賀歲片巡禮】黃子華自編自導《乜代宗師》 大戰葉念琛新一代阿寶

聖誕未到，賀歲檔已經開始宣傳，今日起會同大家分幾集介紹鼠年有咩賀歲片。以往賀歲檔由港產片主導，特別係90年代周星馳無厘頭喜劇同《囍事》系列，真係睇極唔厭；踏入千禧年都仲有《嚦咕嚦咕新年財》頂住，早七八年亦有曾志偉大戰黃百鳴。近年繼續有賀歲片，票房亦見得人，不過無一套令人印象難忘，甚至過目即忘！今年會唔會有驚喜呢？

今個賀歲檔最大贏面應該屬由男神黃子華自編自導嘅《乜代宗師》，故事講述黃子華飾演嘅馬飛龍係馬家雷拳第十九代傳人，卻因一次意外中，於街頭眾目睽睽下被一名女途人擊倒，而大出洋相，一夜之間身敗名裂，淪為「乜代宗師」。後來馬飛龍從記者口中知道女途人大有來頭，原來她是香港西洋拳壇傳奇人物，曾經擁有四十場不敗紀錄的奇女子 — 由劉心悠飾演嘅陳真 ！

電影由黃子華編劇，你就知道故事志不在功夫對戰場面，實際係講男女感情由仇人變愛人定係想講現今社會網上批判現象？實際講咩當然要睇咗戲先知，單睇海報滿面傷嘅子華被手機圍嘅構圖，一次過戲謔《一代宗師》加《殺神John Wick》，令人相當好奇！

《乜》繼2002 年《一蚊雞保鑣》後，相隔 17 年後黃子華再度自編自導自演的電影作品，睇牌面集齊咗極有觀眾緣嘅男神女神，仲結合中國功夫及西洋拳，有齊賣錢元素。當年《一》成績慘淡收得11萬，上映短短5日被逼落畫，收得唔好唔等如戲唔好；上年《棟篤特工》大收4千4百萬，反而不敢恭維。今次子華攞返編導權，《乜》內容會否回勇？不過作為今年唯一港產片，又係極支持本地電影人嘅Golden Scene發行，夠哂理由入場支持。

另一部香港味濃郁嘅賀歲片係由旺角活地亞倫葉念琛執導嘅《我的荀盤男友》，故事大致上係窮家女遇上白馬王子，阿寶（李靖筠 飾）雙親早逝，從小到大都生活艱難，唯有身兼多職。而馬奮（陳家樂飾）則年輕有為，一晚馬奮與公司高層職員在夜店貴賓房召開秘密會議，被阿寶誤認為係害佢好姊妹Pauline自殺的情場騙子，混亂之間，被寶帶到醫院探望昏迷不醒的Pauline。

Pauline大哥牛榮等人以為馬是Pauline男友，要他為妹妹自殺負上責任，牛認為只有馬能喚醒Pauline，為怕他逃之夭夭，故決定強行把他帶回家。馬奮與寶相處後，覺得這女子天真可愛，2人互生情愫，最後，誤會解開，阿寶仲得到個有錢有樣男朋友！不過世上無童話，過到未來奶奶呢關先啦……

葉念琛一年一套賀歲片，上年有《我的情敵女婿》，今年又有《我的荀盤男友》，不過演員陣容不能同日而喻，由嘉玲姐變成半新人李靖筠，任達華變成陳家樂，不過想當年葉念琛唔係靠星光彈起，而係因為講中唔少旺角仔女心事而大受歡迎。雖然電影女角繼續叫阿寶，不過自從鄧麗欣唔再做阿寶之後，葉導啲戲好似趺哂watt，年年有作品面世，但始終不如《獨家試愛》系列喺MK界引起嘅哄動！今年有新阿寶登場，唔知大家又受唔受呢？