靚仔殺人狂真人真事電影 被指美化兇手咁大鑊?

「英俊迷人、有女人緣,備受歡迎,如果從政都應該大有作為」,呢種形容你會諗起咩人?青年才俊?筍盤?估唔到仲可以用嚟形容美國連環殺手Ted Bundy。

Ted惡名昭彰,70年代犯下多宗謀殺,1978年被捕,十數年後先肯認罪,超過30位女性被殺。呢位變態殺人狂犯案手法兇殘,強行擄走或借故誘扣年輕女性,棒擊或勒死受害人後棄屍荒野,甚至回到兇案現場姦屍!

image

最近Netflix就出咗4集有關呢個殺人狂魔嘅紀錄片《Ted Bundy Tapes》,由Joe Berlinger執導,改編自Michaud及Aynesworth同名訪談錄。該書由Ted Bundy 100小時嘅訪問節錄而成,最可怕嘅地方係Ted受訪時笑面迎人,侃侃而談童年生活,仲避重就輕迥避提問,完全衣冠禽獸,毫無悔意,讓人不寒而慄,幸而Ted已於1989年伏法。

人性可怕,不過紀錄片有無令人驚到要有伴先可以睇就見仁見智,Netflix就警告觀眾,唔好自己一個睇呢套片(Maybe don’t watch it alone)。

image

導演Joe拍完紀錄片,再將佢拍成電影《Extremely Wicked, Shockingly Evil and Vile》,不過剛剛釋出嘅預告片,有人指電影有美化變態殺人犯之嫌疑,對唔住死者家人云云。

雖然片名講到明Ted壞人一個,但電影並未將連環殺人故事拍成驚慄片,反而以Ted女友Elizabeth Kloepfer視角出發,Ted多次犯案而無人發覺,非常擅於掩飾與製造假象,Elizabeth既係枕邊人又係受害者(受Ted謊言蒙騙),佢對Ted嘅認知一定有別於大眾。

image

變態殺人狂由大隻型男Zac Efron飾演,其女友Elizabeth Kloepfer就由Lily Colins演繹。主演High Scholl Musical 而走紅嘅Zac有型靚仔、陽光外型切合Ted性格設定,但到出庭辯護嗰幕,chok得嚟又要有啲丁蟹feel,好考工夫!Zac如何演繹角色內心暗陰面,甚或《Extremely》有無做到一如片名咁有批判性,好快就會知。因為電影將會於現正舉行嘅辛丹斯影展(Sundance Film Festival)作首映。