《黑寡婦》唔改期4月尾照上畫 Christian Bale加盟參演《雷神奇俠4》

受疫情影響，唔少電影檔期要大執位。好似迪士尼真人版《花木蘭》亞洲區全部要將映期延後，《007：生死有時》本來上4月，依家一推就推遲到11月先上映，最慘係宣傳活動唔係話改就改。主角Daniel Craig幫雜誌影落唔少大隻佬相，又上美國高收視綜藝節目《Saturday Night Live》錄足成集，片期改咗﹐可惜節目、訪問照出街，白白浪費咗佢同宣傳人員嘅努力。

不過，疫情日日都有新進展，全部停工觀望都唔係辦法。所以迪士尼《花木蘭》北美地區映期照舊上3月尾，同公司嘅金蛋Marvel亦盡量以不變應萬變，繼續電影宣傳計劃；仲未開機嘅《雷神奇俠4》，前日就透過戲內飾演女武士嘅Tessa Thompson把口放風，佢上Entertainment Tonight 節目時親口確定Christian Bale加盟《雷神4》飾演大反派！Christian Bale作為近年最正嘅蝙蝠俠，今次唔拍DC轉投Marvel，確實令人期待！

而另一套期待已久嘅Marvel《黑寡婦》，剛剛推出最新預告片。作為漫威宇宙第4階段作品，既係「黑寡婦」首次擔正、獨立成篇嘅電影，同時又係Scarlett Johansson最後一部「黑寡婦」，相信所有Marvel迷都唔會錯過。

電影將設於故事時間點設定在《美國隊長 3 : 英雄內戰》之後，同埋《復仇者聯盟：無限之戰》之前，講述黑寡婦因為幫助美國隊長而踏上流亡之路。正想拋開一切重新來過，但「過去」卻不願放過佢，受到反派Taskmaster嘅追殺，逼使佢面對過往神秘嘅間諜生涯。

「黑寡婦」背景一向神祕，十年漫威電影中都鮮有透露其過去，今次終於講多啲。新片將會披露佢過往於Red Room受訓成殺手、間諜嘅情節，及首次描寫佢與家人嘅關係！預告片中可見由《小婦人》女星Florence Pugh飾演嘅Yelena Belova視黑寡婦為姊姊，而且會同用「黑寡婦」個朵執行任務！

電影仲有新登場角色，包括大反派「模仿大師Taskmaster」，佢擁有複製能力，睇過一次就能完美模仿對方動作及聲音，依家控制住Red Room，命令Red Room內嘅女殺手們追殺「黑寡婦」，同場仲有Rachel Weisz飾演嘅 Melina Vostokoff ，又名Iron Maiden，佢係少數通過5次Red Room訓練嘅殺手，卻一直活係「黑寡婦」陰影下。

戲內仲會有Red Guardian一角登場，佢類似俄版「美國隊長」，此角將由《怪奇物語》嘅警長爸爸David Harbour飾演，角色造型少數唔似Marvel超級英雄，似足中年走樣叔叔，個look可能係角設，同故事發展有關連？

《黑》暫時無意改期，照舊上4月30日，原本同期對戰《007：生死有時》，依家007改咗11月先上，無咗個強橫對手，絕對有利票房。外媒預計《黑》首周票房會高開9000萬至1億3000萬美金！Marvel電影一向吸金力強，故事舖排亦相當高手，唯一隱憂係屆時疫情發展仲係未知之數！