《2019亞洲小姐總決賽》賽果出爐 冠軍江雨婷原來係落選港姐

《2019亞洲小姐總決賽》噚日靜靜雞喺大埔亞視總部舉行，除咗搵嚟陳啟泰及金剛做司儀，仲搵咗幾位大台前藝人做頒獎嘉賓，包括有亞視候任副總裁林文龍、其老婆郭可盈、前亞姐羅霖及江華等等。冠、亞、季軍分別係8號江雨婷（廣東代表）、15號羅思雅（香港代表）及16號王騫婭（阿聯酋代表），而大熱倒灶嘅2號翁子涵就獲得最上鏡小姐獎，1號楊采薇奪得最友誼親善獎及5號張可盈奪得最佳完美體態獎。

冠軍江雨婷今年22歲，而家仲喺香港教育大學讀書，佢之前參加港姐但冇得到任何獎項，一參加亞姐即刻攞個冠軍返嚟。有傳媒問佢會唔會覺得無綫唔識貨，佢就話評分唔同，各有各嘅好。

至於擁有碩士學歷嘅亞軍羅思雅，被問到有冇感到失望，佢就話冇失望，可能喺某啲方面嘅表現比較遜色。另外，佢話對唱歌有興趣，都想喺演藝圈發展。

今次亞姐選舉，亞季軍都會得到一層樓做獎品，亞軍就表示唔會去住，可能用來做民宿。而季軍就話會賣咗間屋，然後將賺到嘅錢用嚟做善事，幫助弱勢社群女性。

如果大家想睇足本重溫嘅話，亞視安排賽事於1月4日晚上8時30分喺香港開電視 （77台）、ATV App及ATV網站等網上平台播放。