【五金舖入貨】5件必試的戶外裝備

無論居家定旅行，五金舖都可搵到啱用嘅嘢。

五金舖買露營行山用品？係咪老點先？非也，我哋唔係前高官，都識得去便利店買廁紙，搭地鐵用八達通，呢方面嘅治理能力一定無問題。

五金舖絕對有大把嘢啱行山露營用！下面呢幾樣絕對啱大家用：

1. 防滑手套
最近喺行山谷瘋傳，一對價值30蚊嘅「勞工手套」，絕對抵得上百幾二百蚊專業級行山手套。除咗防滑、具保護效能外，要篤手機時亦唔使除低，非常萬能！

2. 防水噴膜
事發喺2016年渣打馬拉松前夕，天氣預佈比賽當日落大雨，於是有人四出搵方法令跑鞋唔入水。呢個想法當然係水中月，鏡中花，根本唔實際。不過一時之間，就令到呢支嘢大熱。

如果發現背囊、帳幕等裝備，內層一層防水層脫落，可試下用呢支嘢噴幾噴，可以救番個裝備，唔使咁快要換新。佢除咗防水外，而家新出嗰啲仲話可以防UV、防潮、防霉…… 真係試過先知掂唔掂。

3. 膠索
可以說係居家旅行必備，用嚟綑綁、修補，一索就得，用途多到講唔晒。

4. 反光帶
行夜山超強裝備，只要有少少光源 (例如月光)就足夠令佢發光，睇到同伴。部份五金舖有反光衣賣，亦會有呢啲反光帶賣。

5. 鞋套
行過毅行者，喺第二段要行落大浪西灣，一定經歷過幼沙入鞋嘅痛苦。呢款鞋套可以阻撞啲沙經由鞋面入腳，未必阻得晒，不過都應該可以一用。

有人問，點解五金舖會有鞋套賣？裝修師傅入新屋，唔著個鞋套咪要踩污糟個客嘅純白地氈囉！

(按：鞋套屬即棄用品，會製造垃圾，都係少用為妙。)

其實五金舖仲有好多好嘢，好似話俗稱「豬腸」嘅冷氣膠喉，可以用嚟改良背囊嘅軟墊。去五金舖買鋁通，又可以維補爛咗嘅營幕支架。

而且，香港嘅五金舖絕大多數都係小本生意。大家支持小店嘅話，不妨得閒落舖頭搵下仲有咩寶藏！

(原文)

更多：
Fitz.hk 網址

Fitz.hk Facebook 專頁