庸材自擾：你以為港男唔鍾意港女？其實男人最憎嘅係狗公

最近認識咗一個台灣朋友，大家少不免交流下男女文化，台灣朋友不諱言「港女」名聞中外，同台灣女性嘅溫柔有好大分別，佢問我香港地嘅男人要識女仔係咪真係咁難，係咪一定要有樓先可以結婚娶老婆。

我聽完其實有少少尷尬，不過作為一個香港人，我覺得有必要同香港嘅女性辯護，講幾句好說話。

我同佢講：「少年！你太年青了！唔好道聽途說以為香港嘅女仔係咁潑辣，其實因為香港嘅女仔太叻，某程度上學識比男性更高，所以好多時候香港嘅女仔響擇偶方面有較高要求，而一啲層次低嘅男性就因為溝唔到女所以就惡意中傷香港嘅女仔…..」

「咁即係話網上面成日講話港男憎港女嘅說法都係假？」台灣朋友續問。

「假架！其實如果真係要比，香港嘅男性更加討厭狗公！」

台灣朋友唔太理解狗公嘅意思，我再三解釋香港嘅男性自小就已經喺一個競爭性嘅環境下長大，相信良禽擇木而棲嘅，所以有時候失敗會心有不甘，卻會演變為成長嘅動力。

不過，作為一個男性，就算點鍾意一個女仔都好，自身嘅尊嚴卻唔會輕易放下，所以有時候對於女性嘅無理要求，都會一一拒絕。之不過，呢個時候，好多處於食物鏈下層嘅狗公就會出動，以聽話、隨傳隨到、喪失尊嚴等下三流手段去滿足港女嘅要求。

「咁即係同台灣人既馱獸一樣？呢種人唔好話香港人，台灣人都好憎！」台灣朋友聽完都有啲激動，大概作為一個男人，狗公或者馱獸都一樣令人憎恨。

一段愛情，我總覺得男女雙方都必須處於對等關係，亦即係互相尊重。大男人令到女人冇發表意見既權利，女人只會感到無奈和痛苦；女人成日當男人係奴隸獸，成日提出無理要求去滿足自己私慾，男人會感到羞恥抬唔起頭做人。

做人要有尊嚴，有腰骨。好多男人以為對女神百般遷就，將自己放去下一個狗都不如既位置，以為咁就叫做愛同付出，其實呢啲行為叫做弱智。

一日狗公，一世狗公！

道理，簡單易明。