伍慧珊守身如玉 做足16年茄喱啡

近排娛樂圈又出現一名新咪神－伍慧珊！前日恐怖電影《幼兒怨》開鏡，同場有劉心悠、崔碧珈（Anita）、劉浩龍（師兄），不過風頭就完全被伍慧珊搶晒。因為佢著咗一件上身透視東西半球，下身三角位置僅僅遮到嘅戲服現身，郁動時仲經常不慎露毛，搞到劉心悠都話唔夠膽亂咁望。

大家唔好誤會！雖然佢咁搏，但佢並唔係新人要博出位，其實佢入行已經超過20年！大家望真啲佢個樣熟口熟面，佢以前喺TVB拍過唔少劇集，只不過你未必叫得出佢個名啫！

今年39歲嘅伍慧珊, 17歲就加入無綫訓練班，同佢同期嘅仲有湯盈盈。雖然佢擁有36D、24、36嘅魔鬼身材，不過佢喺無綫16年生涯一直「守身如玉」，就算有水著活動都唔會好似而家啲女明星咁借身材上位，佢話係因為以前對自己身材冇信心。正因為咁，佢喺無綫一路都只係喺主角身邊做閒角，不過生活都總算過得去。但自從11年陳國強入主後，有指本身屬於佢嘅角色都被極高層安排親信做，搞到佢成年都只係得幾千蚊收入。所以2012年決定離開TVB，加入香港電視。

其實除咗演戲，伍慧珊唱歌都ok㗎，間唔中都有唔少商演同登台演出，佢喺內地人氣都算唔錯㗎～

佢表示今次喺電影入面會搏到盡，雖然唔使露點，不過就會著件勁過呢件露毛衫嘅戰衣挑逗劉浩龍。如果大家已經睇厭咗TVB班「咪神」，不妨可以支持下呢位默默耕耘嘅伍慧珊！