港女講日：係男人都想追!日本妹5個小心機提升男人緣

恭喜日本國民級女神新垣結衣，首度奪得由日本Video Research公司每年調查兩次嘅「電視藝人好感度」第一位!結衣BB男女通殺，男人個個想娶佢做老婆，女人呢…當然就係勁羨慕佢可以咁受男人歡迎啦!各位女生如果想提升男人緣，令男人好感度up，新垣結衣一定係最佳人板!

1.燦爛笑容

笑容係一樣好奇妙嘅東東，就算女人冇魔鬼身材、女神外貌，只要佢笑得好似天使咁純潔燦爛，對男人嚟講，有一種好難抗拒嘅吸引力!

2.呆萌樣

唔理男人定女人，對可愛嘅嘢都係無免疫力，男人10個有9個都鍾意cute cute女生，適當時嗲吓、間中做吓大頭蝦，男人就會好想保護你。

3.愛心爆棚

男人緣好嘅女人通常都係勁有愛心，最鍾意同小動物、小朋友相處，突出有耐性、善良特質，男人最欣賞。

4.多讚美少挑剔

奄尖聲悶嘅女人，係男人都怕，同異性相處時唔好乜都唔滿意，樣樣彈三彈四，試吓多一份讚美，係男人都鍾意人讚。

5.治癒系

識得安慰人、善於做耹聽者、凡事大事化小、充滿正能量…做個可以治癒男人嘅女生，點會冇拖拍?

圖片來源：ig@aragakiyui_fanspage