Yahoo奇摩運動 【電影LOL．煲劇抗疫】ViuTV播滄海遺珠日劇 腐女漫畫家相睇搵男人
最近多咗時間宅在家中，發現原來有好多有趣嘅電視劇睇漏眼，好似今個星期六深夜會喺藍Viu(99台）度播嘅日本單元劇《但是，我想結婚！~BL漫畫家的相親記~》，改編自藤本悠希嘅自傳漫畫《我是BL漫畫家，也可以結婚嗎？》，於2017年拍成特別劇，由好耐無見過嘅栗山千明及要潤主演。
故事一如漫畫名，講述好眉好貌其實仲生得幾靚嘅漫畫家藤本，自中學年代已經熱愛BL漫畫，加上有畫畫天份，最終佢成功出道成為BL漫畫家，成為腐女界偶像。醉心工作與創作嘅佢唔覺唔覺已經3字頭，突然發覺自己獨咗好耐，雖然擅長畫男男題材，不過現實生活無任何異性相處經驗，身邊連男性都缺乏，被全女班包圍，但係個個朋友、助手都有著落，得佢一個單身！
久欠實戰經驗嘅佢已經忘記點同男人相處，為咗搵對象決定去相睇，個性怕醜又內向嘅佢偏偏遇親都係騎呢男，例如貓奴但做人無禮貌嘅生田、隨口貶低BL漫畫嘅麻甩大叔！睇唔上眼都唔係咩問題，佢自己都烏龍百出，打保齡球打到人地隻腳、玩飛標又飛落人地額頭！不過最弊係助手帶埋男朋友出嚟諗住double date無咁尷尬，但藤本眼中只見到2個男人之間嘅hehe火花！
最後終於遇上同樣內向、同沉迷數字不擅於同人相處嘅大學老師中野（要潤 飾），因為大家都怕醜又各自有沉迷嘅對象，反而溝通到！可惜藤本過唔到自己心理關口，講唔出自己係BL漫畫家，仲自作多情以為一講真相，中野就會嫌棄自己，仲因此決定受硬情傷而走頭，好彩中野無放棄，因為佢根本唔知BL為何物，仲鼓起勇氣現身藤本嘅簽書會以表心跡！最後當然有個大團圓結局。
飾演女主角藤本嘅栗山千明雖然唔係腐女，不過佢熱愛動漫於演藝界都係眾所周知嘅事，為咗角色佢亦特地去池袋腐女聖地朝聖，以助代入角色，佢仲話好尊敬漫畫家，希望佢於劇中對於男男之間hehe嘅妄想演繹可以得到漫畫家藤本嘅認可。我反而想知相睇係咪真係會識到要潤呢啲靚仔而唔自知嘅男人，現實無論係腐女定中女都好需要睇仔囉！
更多電影文章
【電影LOL】Netflix拍福爾摩斯反叛細妹外傳 焦點反而係2位靚仔阿哥？！
