《延禧攻略》高貴妃 譚卓入行十年終於上位

最近內地宮廷劇《延禧攻略》大熱，皇后好靚又好人，不過牡丹再美都要綠葉扶持，無左奸角高貴妃，又點有難題俾女主角魏瓔珞解圍呢？不過要奸得唔討厭，少啲演技都搞唔掂，《延禧攻略》係飾演高貴妃嘅譚卓首部電視作品，不過你以為佢係新人就錯啦，佢其實一出道就好戲到衝出國際！

譚卓的演出以電影作品為主，2009年首部電影係婁燁導演嘅《春風沉醉的晚上》。電影於康城影展受到高度關注，當時導演同主要演員都有出席影展，電影更獲得康城影展最佳編劇獎。譚卓則憑周旋於2男之間嘅工廠女工李靜一角，獲提名康城影展最佳女主角，一出道就受到國際關注。

譚卓無因為國際影展嘅加持而轉行商業片、主流明星嘅道路，反而小心選擇劇本，密密深化演技。電影《失控》入面飾演因壓力而絕望失控嘅瑜伽導師，情緒崩潰的演出大受好評。再之後出演賈樟柯監製的《Hello，樹先生》，今次挑戰啞女角色小梅，角色無對白仲成日用頸巾遮住半邊面，譚卓只靠眼神演出小梅獨立堅強，努力生活嘅模樣，少啲演技點得？

譚卓參與作品唔算多，因為鍾意演戲而入行做演員，一向對名氣地位唔多著重，今年出道10周年終於行大運，要擋都擋唔住！先係電影《我不是藥神》內地大收30億，票房同評價一樣高開，佢係戲中飾演單親媽媽劉思慧，性格堅強，生活再苦都無怨無悔，為左幫患病愛女賺取醫藥費而成為鋼管舞女郎，就為左電影入面唔到20秒嘅鋼管舞鏡頭，譚卓特別學左個半月鋼管舞，跳到腳踝軟骨碎裂！最近又因為電視劇《延禧攻略》高貴妃一角大受注目，成為入屋藝人！

所以話除左天時地利，人嘅因素都好重要，畢竟機會係留俾有準備嘅人。