莊思敏匿豪宅行禮 魚網馴夫

藝人莊思敏（Jacquelin）昨日與拍拖不足一年的男友秘婚，未能來港的父母透過視像見證，新娘子在十多名親友起哄下，與老公三度甜蜜咀嘴。至於思明從家姐手上接到花球，但對婚期處之泰然，揚言要先有事業才可過安穩生活，似乎唔憂嫁！

現年39歲的莊思敏與台灣珍珠奶茶店老闆楊秉逸（Brian）昨日拉埋天窗，她曾揚言不會大排筵席，所以只邀請了律師及十多名親友到其豪宅見證簡單簽字儀式。新娘子先後換了三套婚紗及禮服，其中包括露腰裝和低胸魚尾婚紗，盡騷好身材！一對新人走到泳池邊拍照，心情大靚的Jacquelin不時與老公咀嘴，又向鏡頭嘟嘴賣萌。

烏龍漏咗交換戒指

受疫情影響，Jacquelin及Brian雙親未能來港見證，只透過視像電話參與婚禮，期間莊母教愛女用魚網緊套老公，但又要讓他透透氣，認真搞笑！一對新人宣讀誓詞後與親友合照，要人提醒才記起要交換戒指，烏龍百出，之後他們在親友起哄下三度咀嘴，甜到漏！完成儀式後，新娘拋花球，最終由妹妹莊思明接得。

新娘子受訪時表示：「雙方家長最後都嚟唔到現場，簽字時FaceTime佢哋，阿媽好想講嘢，我又聽唔到佢講嘢，所以都幾搞笑。現場好多係自己朋友，好輕鬆似開Party多啲，成件事好開心，未有特別感覺。啱啱做人老婆，暫時個狀態都係差唔多，我會繼續開工，老公之後返台灣要隔離，我好感謝佢今次過嚟，跟住要接受兩星期嘅隔離。」

莊思明接花球唔憂嫁

接到花球的莊思明難掩興奮心情，笑說：「好多人都想我接到，家姐特登拋畀我，大家好有我心，多謝晒！（同楊明婚期不遠？）未定，我哋有共識，想事業再好啲先，咁生活先會更穩定！」她又分享婚禮上的趣事：「爸爸媽媽都好開心，媽媽好搞笑，簽字一刻竟然大叫，問家姐諗清楚未！」其男友楊明受訪時坦言對婚期零壓力:「我哋會照住大家步伐進行，暫時都係搵錢，儲厚個底先！（送咩畀一對新人？）利是最實際，今日最感動係聽佢哋講誓言，因為平時冇聽過嘛！」