第4次翻拍 《星夢情深》歷代版本回顧

樂壇天后Lady Gaga主演、Bradley Cooper自導自演嘅《星夢情深》（A Star is Born）北美已經上映，開畫票房稍遜《毒魔》（Venom）排第2，不過評價就好得多啦。

《星》要到下星期香港先上映，未睇戲之前不妨了解下套戲嘅背景。《A Star is Born》算係舊瓶新酒，套戲已經係第4次翻拍，不過唔係Marvel動漫，reboot唔一定毀你美好回憶，每次翻拍都有根據當時社會意識形態與時並重咁修改劇本。我地一齊嚟睇下咁多年嘅變化。

《A Star is Born》故事大綱大致相同，事業有成男主角愛上嶄露頭角女主角，幫助佢成名，但女方成名之後感情開始變質。第1套《A Star is Born》於1937年上映，當時仲係黑白片年代，由 Janet Gaynor飾演女主角Esther，酗酒男主角由Fredric March飾演。故事女主角唔係歌手而係演員，當時套戲比較多著墨荷里活影圈嘅黑暗、艱難，希望打撃發明星夢而離家嘅少女們，所以戲軌比較多以男性角度出發，女主角只係輔助。

1954年版《A Star is Born》較多人認識，女主角由童星時代憑飾演《The Wizard of Oz》Dorothy一角而大紅大紫嘅Judy Garland飾演。54年版本為左Judy Garland度身修改，套戲重心放哂喺女主角度，又改成音樂劇，套戲仲係當時華納電影最高製作費嘅電影。

《A Star is Born》可以話係挽救Judy Garland電影事業嘅最後一擊，因為當時32歲嘅Judy Garland票房開始走下坡，又受精神濫藥酗酒問題困擾，可幸Judy Garland交出演技，同年獲得奧斯卡女主角提名，可惜票房未如理想，電影公司要由片長3個鐘剪短成2個半鐘換多啲場次。不幸地因為票房唔理想，Judy Garland電影生涯接近尾聲，轉而向歌壇發展。

1976年版本由歌壇典堂級人馬Barbara Streisand主演，適逢70年代女性解放，兩性關係比以往開放得多，所以呢個版本嘅男主角變成rock n roll巨星，仲成套戲啲衫鈕都無扣埋過。

幾個版本嘅女主角都因為同男主角談戀愛兼得到男人嘅幫助而成功，雖然都要男人幫，不過有分別。37年同54年版本，女主角叫自己做「Mrs. Nomand」，74年Streisand嘅版本就未冠夫姓，繼續沿用未嫁前嘅名「Esther Hoffman」，好似好微少但都足以睇到時代嘅變化。呢個版本影評好差不過票房好好，入面首歌「Evergreen」仲成為左Barbara Streisand其中一首飲歌！

嚟到2018年版本，男主角資深音樂人Jackson Maine（Bradley Cooper 飾）發掘了Ally (Lady Gaga 飾)，並與她墮入愛河，Ally開始走紅而Jackson酗酒問題日漸影響佢嘅事業。以往版本嘅男主角會因為女方成名、事業有成而不安，更成為2人感情走下坡嘅導火線，今時今日大家追求2性平等，所以Jackson唔係因為女方成名而不快，反而因為Ally無忠於自己、為左照顧市場需要而創作產生分歧。

每個版本喺當時都有好大嘅迴響，相信其中一個關鍵係隨時代進步而修改嘅劇本，故事有前車可轞，亦証明呢種橋段係經典。2018年最新版本仲有Lady Gaga創作嘅全新歌曲，戲入面每個音樂表演，Lady Gaga都堅持唱Live，經典故事加Gaga演唱，就算係翻拍一樣咁有吸引力。