《龍咁威3》未有聲氣 龍威同吳樹喜泰國分頭發功！

一連幾日為大家介紹咗鼠年有咩賀歲片，由本土勵志、愛情、喜劇、到中港合拍片都有，可謂非常熱鬧。可惜唔少人期待嘅《龍咁威3》不在賀歲片單之列。

年初鄭中基紅館開個唱時喺台上宣佈，將會原班人馬開拍《龍咁威3》，消息一出網路幾近暴動，唔少觀眾都即時回味返《龍咁威》、《龍咁威2》有幾好笑，其中「瑞士山區肺」嘅騙徒個案以及白飯魚鞋真係有白飯魚嘅情節，事隔多年再睇都依然好笑！

可惜有消息指，因為《龍》題材問題，未能取得內地審批，加上拍攝投資額過高而未能成功搵到水喉支持。雖然鄭中基親自回應電影由頭到尾都為香港而拍，唔存在內地審批問題，咁唯有寄望《龍咁威3》盡快拍得成，相信觀眾唔介意套戲賀唔賀到年，最緊要有得睇。因為純港產片真係買少見少，大家都餓咗好耐！

龍威要過多一排先會重現江湖，不過相信勁大隻嘅《阿龍》應該會喺鼠年同大家見面。呢部由鄭中基自導自演、有份編劇嘅新片，講述阿龍身負前妻賭債生活潦倒，與八歲女兒相依為命。當還清所有債務，便帶女兒去泰國旅遊完成她多年的心願，可惜抵泰不久，女兒就被拐子集團擄走。痛失至親後，阿龍為了留下不惜與當地華僑再婚，兩年來暗中打聽拐子集團消息。為了揪出兇手，甚至入獄，變得暴戾兇殘。

阿龍為咗個女不惜化身最強老爸，誘發出潛藏陰暗面，而鄭中基為咗演活呢位碼頭工人落咗唔少苦功。配合角色令自己厚實同大隻啲，特別用咗半年時間增磅增肌肉，仲因為增磅暴食而搞到燥底，爆到成面暗瘡，拍攝期間又要操肌又要導戲，都幾辛苦下！

賀歲檔雖然無龍威，不過有龍威個老死吳樹喜，即係李燦琛 ！今次佢化身做制片徐蝦為大家帶嚟《大盜演》，故事講述佢同副導演張炳文（姜文傑飾）帶領拍攝團隊正在泰國進行《雌雄大盜》電影拍摄。點知意外多蘿蘿，當紅的男女主角未完成戲又要收工，仲要監製（田啟文飾）挾款逃亡，剩底一大筆債務同拍咗七成嘅戲份。。

《大盜演》專程喺泰國拍攝，由「萬年妹仔」樂瞳做女主角，仲有《三夫》嘅曾美慧孜參演，以及改咗名做詹昊宸嘅詹瑞文，鍾意港產喜劇嘅朋友，過年搵戲睇不妨考慮下！